ക്വാര്‍ട്ടറില്‍ നെയ്‍മര്‍ കളിച്ചേക്കില്ല
ജന്മ നാട്ടില്‍ ലോകകപ്പ് കിരീടം സ്വപ്നം കാണുന്ന ബ്രസീലിന് തിരിച്ചടിയായി സൂപ്പര്‍ താരം നെയ്മറിന് പരിക്ക്. ചിലിക്കെതിരെ നടന്ന പ്രീക്വാര്‍ട്ടറിനിടെ തുടയ്ക്ക് പരിക്കേറ്റ നെയ്മറിന് കൊളംബിയക്കെതിരായ ക്വാര്‍ട്ടര്‍ മത്സരം നഷ്ടമായേക്കുമെന്നാണ് സൂചന. കൊളംബിയക്കെതിരായ മത്സരത്തില്‍ സൂപ്പര്‍ താരത്തെ കളത്തിലിറക്കാന്‍ പരമാവധി പ്രയത്നിക്കുമെന്ന് പരിശീലകന്‍ സ്കൊളാരി അറിയിച്ചിട്ടുണ്ടെങ്കിലും നെയ്മറില്ലാതെ സാഹചര്യം മറികടക്കാനുള്ള തന്ത്രങ്ങള്‍ മെനയുന്നതിന്‍റെ തിരക്കിലാണ് ആതിഥേയരുടെ ക്യാമ്പ്.
ചിലിക്കെതിരായ മത്സരത്തിലെ നാലാം മിനുട്ടിലാണ് നെയ്മറിന് പരിക്കേറ്റത്. മത്സരത്തില്‍ മുഴുവന്‍ സമയവും കളത്തില്‍ ചെലവിട്ട താരം ഒരു പെനാലിറ്റി ഗോളാക്കി മാറ്റുകയും ചെയ്തിരുന്നു. നാല് ഗോളുകളുമായി ടൂര്‍ണമെന്‍റിലെ സാന്നിധ്യമറിയിച്ച സൂപ്പര്‍ താരത്തിന്‍റെ സേവനം ക്വാര്‍ട്ടറില്‍ ലഭ്യമായില്ലെങ്കില്‍ കാനറികള്‍ക്ക് അത് കനത്ത തിരിച്ചടിയാകും. ചിലിക്കെതിരെ മുടന്തി നേടിയ ജയത്തിന്‍റെ സാഹചര്യത്തില്‍ പ്രത്യേകിച്ചും.
